L-għarfien dwar il-kanċer, li jinqabad kmieni kemm jista’ jkun u t-tagħlim biex wieħed jgħamel l-għażliet ta’ ħajja b’saħħitha jistgħu jagħmlu differenza sinifikanti fil-ħajja. Hemm kundizzjonijiet tas-saħħa, inkluż il-kanċer fejn bi stil ta’ ħajja tajjeb għas-saħħa, bidliet żgħar fil-ħajja tagħna ta’ kuljum, li nattendu għall-iskrinjar skedat u t-tilqim jistgħu jnaqqsu r-riskji b’mod sinifikanti.

It-tbatija minn problema ta’ saħħa mentali ma tipprevenix lil dak li jkun mir-riskji li jiżviluppa l-kanċer iżda pjuttost iżżid ir-riskji. Rabta diretta bejn disturbi fis-saħħa mentali u r-riskju ta’ kanċer mhiex dejjem ċara minn studji li saru. Madankollu, hu rrappurtat li hemm riskji ogħla għall-kanċer relatat ma’ mġiba assoċjata ma’ problemi ta’ saħħa mentali fosthom tipjip, xorb alkoħoliku, nuqqas ta’ attività fiżika, problemi ta’ irqad u tendenza lejn piż żejjed u ħxuna żejda.

B’dan il-ħsieb, il-Kummissarju għas-Saħħa Mentali, Dr Denis Vella Baldacchino, jixtieq jenfasizza l-importanza tal-iżvilupp ta’ interventi f’waqthom biex jitnaqqas ir-riskju fost individwi bi problemi ta’ saħħa mentali sabiex jiġu promossi s-saħħa u l-għejxien tajjeb tul il-ħajja kollha. Il-Kummissarju jappoġġja bis-sħiħ l-inizjattiva tal-Ministeru għas-Saħħa u Anzjanita Attiva biex iħeġġeġ lill-persuni kollha jieħdu opportunitajiet għal programmi ta’screening. Wieħed għandu jevita kull forma ta’ tipjip u konsum ta’xorb alkoħoliku. Hu rrakkomandat li wieħed jattendi għal klassijiet ta’ waqfien jew gruppi ta’appoġġ. Wieħed għandu jiżgura li jkun protett meta jkun espost għax-xemx u importanti li jieħu t-tilqim rakkomandat biex jiġu evitati ċerti kanċers. L-aħħar iżda mhux l-inqas wieħed għandu jżomm ma’ dieta tajba għas-saħħa u jżżomm ruħu attiv. Dawn huma ta’ benefiċċju mhux biss għall-prevenzjoni tal-kanċer iżda ċ-ċavetta għall-benesseri ġenerali inklużi riżultati aħjar meta wieħed ikun għaddej minn problemi ta’ saħħa mentali.

Għal appoġġ ikkuntattja lid-Direttorat għall-Promozzjoni tas-Saħħa u l-Prevenzjoni tal-mard.